कोपरगाव : श्रीमान गोकुळचंदजी विद्यालयाचे मुख्याध्यापक श्री. रघुनाथ लकारे हे आपल्या ३३ वर्षांच्या प्रदीर्घ सेवेतून सोमवार दिनांक ३० जून २०२६ रोजी सेवानिवृत्त झाले. विद्यालयाच्या वतीने त्यांच्या यशस्वी कामगिरीचा सन्मान करण्यासाठी सेवापूर्ती सोहळ्याचे आयोजन करण्यात आले होते. कार्यक्रमाची सुरुवात विद्यालयाचे प्रेरणास्थान कै. गोकुळचंदजी ठोळे यांच्या अर्धाकृती पुतळ्यास पुष्पहार अर्पण करून झाली. या कार्यक्रमाच्या अध्यक्षस्थानी संस्थेचे अध्यक्ष श्री. कैलास ठोळे उपस्थित होते.
श्री.रघुनाथ लकारे हे १९९३ साली या विद्यालयात शिक्षक म्हणून रुजू झाले होते. इंग्रजी विषयाचे अभ्यासक म्हणून त्यांचा शिक्षण क्षेत्रात आणि सर्वत्र मोठा नावलौकिक आहे. त्यांच्या ३३ वर्षांच्या प्रदीर्घ सेवाकाळात त्यांच्या हाताखालून शेकडो विद्यार्थी शिकून बाहेर पडले. आज देश-विदेशात विविध क्षेत्रांत ते यशस्वीपणे कार्यरत आहेत.
जून २०२५ पासून त्यांनी विद्यालयाच्या मुख्याध्यापक पदाची महत्त्वाची धुरा सांभाळली. आपल्या कार्यकाळात त्यांनी विद्यार्थी आणि शाळेच्या सर्वांगीण हिताचे अनेक दूरगामी निर्णय घेतले.
श्रीमान गोकुळच्याचंदजी विदयालयाच्या वतीने मुख्याध्यापक श्री. रघुनाथ लकारे यांचा सपत्नीक शाल, श्रीफळ आणि सन्मानचिन्ह देऊन यथोचित गौरव करण्यात आला. संस्थेचे सदस्य डॉ. अमोल अजमेरे यांनी आपल्या मनोगतातून लकारे सरांच्या अष्टपैलू कारकीर्दीवर व जीवनशैलीवर प्रकाश टाकला. सरांचा आदर्श डोळ्यांसमोर ठेवून सर्व शिक्षक व शिक्षकेतर कर्मचाऱ्यांनी शाळेच्या प्रगतीसाठी जोमाने काम करावे, असे आवाहन केले.
सत्काराला उत्तर देताना सत्कारमूर्ती श्री.रघुनाथ लकारे अत्यंत भावुक झाले होते. त्यांनी विद्यालया प्रती असणारे आपले अतूट प्रेम आणि जिव्हाळा व्यक्त करताना सांगितले की, “या विद्यालयाने मला समाजात एक वेगळी ओळख करुन दिली आहे, मी शाळेच्या कायम ऋणात राहील.
संस्थेचे अध्यक्ष श्री. कैलास ठोळे यांनी आपल्या अध्यक्षीय भाषणात लकारे सरांच्या कर्तव्यदक्षतेचे, योगदानाचे विशेष कौतुक केले. त्यांनी सरांना पुढील कौटुंबिक व सामाजिक वाटचालीस मनःपूर्वक शुभेच्छा दिल्या, तसेच त्यांच्या दीर्घ व निरोगी आयुष्यासाठी प्रार्थना केली.
या समारंभाला संस्थेचे स्कूल कमिटीचे अध्यक्ष श्री चंद्रकांत ठोळे, कोपरगाव एज्युकेशन सोसायटीचे अध्यक्ष श्री कैलास ठोळे, सचिव श्री दिलीप अजमेरे, सहसचिव श्री सचिन अजमेरे, खजिनदार श्री आनंद ठोळे, सदस्य डॉ अमोल अजमेरे, श्री संदीप अजमेरे, श्री. राजेश ठोळे तसेच विद्यालयाचे माजी मुख्याध्यापक श्री मकरंद कोऱ्हाळकर , माजी शिक्षक श्री दिलीप तुपसैंदर , माजी उपमुख्याध्यापक श्री अनिल अमृतकर, माजी शिक्षक श्री अनिल काले हे देखील उपस्थित होते.
या प्रसंगी विद्यालयाचे जेष्ठ शिक्षक श्री सुरेंद्र शिरसाळे, पर्यवेक्षक श्री बलभीम उल्हारे, प्राथमिक विभागाच्या मुख्याध्यापिका सौ. संगीता मालकर, शिक्षक व शिक्षकेतर कर्मचारी वृंद उपस्थित होते. कार्यक्रमाचे सूत्रसंचालन श्री दिगंबर देसाई यांनी केली.
