कु. दिया कोठारी यांच्या वाढदिवसानिमित्त ३००विद्यार्थ्यांना मोफत टूथपेस्टचे वाटप
कोपरगाव :- वाढदिवसाचा आनंद केवळ वैयक्तिक उत्सवापुरता मर्यादित न ठेवता सामाजिक बांधिलकी जपत तो साजरा करण्याचा प्रेरणादायी उपक्रम कोपरगाव येथे राबविण्यात आला. कोलगेट-पामोलिव्ह इंडिया लिमिटेड आणि कोठारी सेल्स कॉर्पोरेशन यांच्या संयुक्त विद्यमाने श्रीमान गोकुळचंदजी विद्यालयातील सुमारे ३०० विद्यार्थ्यांना कु. दिया अमोल कोठारी यांच्या वाढदिवसानिमित्त मोफत टूथपेस्टचे वाटप करण्यात आले.
विद्यार्थ्यांच्या आरोग्याची काळजी घेत त्यांच्यामध्ये दातांची स्वच्छता आणि तोंडाच्या आरोग्याविषयी जागरूकता निर्माण करण्याच्या उद्देशाने या उपक्रमाचे आयोजन करण्यात आले होते. वाढदिवसानिमित्त अनावश्यक खर्च न करता विद्यार्थ्यांच्या आरोग्यासाठी उपयुक्त वस्तूंचे वाटप करण्याचा हा उपक्रम समाजासाठी एक आदर्श निर्माण करणारा ठरला.
या कार्यक्रमाला श्री. अमोल कोठारी, सामाजिक कार्यकर्ते सुशांत घोडके आणि डॉ. सिद्धी आनंद कोठारी यांची प्रमुख उपस्थिती होती. यावेळी डॉ. सिद्धी कोठारी यांनी विद्यार्थ्यांना दातांची स्वच्छता, दात घासण्याची योग्य पद्धत, तोंडाचे आरोग्य आणि दंतविकारांपासून बचाव करण्यासाठी घ्यावयाची काळजी याविषयी सविस्तर मार्गदर्शन केले. दात दिवसातून किमान दोन वेळा योग्य पद्धतीने घासणे, गोड पदार्थांचे अतिसेवन टाळणे, जेवणानंतर तोंड स्वच्छ धुणे आणि नियमितपणे दंतचिकित्सकांचा सल्ला घेणे आवश्यक असल्याचे त्यांनी सांगितले.
दातांचे आरोग्य उत्तम राखण्यासाठी लहानपणापासूनच स्वच्छतेच्या योग्य सवयी अंगीकारणे गरजेचे आहे. दात आणि हिरड्यांची स्वच्छता राखली नाही, तर भविष्यात विविध दंतविकारांना सामोरे जावे लागू शकते. त्यामुळे विद्यार्थ्यांनी स्वतःच्या आरोग्याची काळजी घेण्याबरोबरच आपल्या कुटुंबीयांमध्ये आणि मित्रपरिवारातही दातांच्या स्वच्छतेविषयी जनजागृती करावी, असे आवाहन डॉ. सिद्धी कोठारी यांनी केले.
यावेळी श्री. अमोल कोठारी यांनी विद्यार्थ्यांना मार्गदर्शन करताना शिक्षण, कला, क्रीडा आणि विविध क्षेत्रांत प्रगती करून समाजात स्वतःची स्वतंत्र ओळख निर्माण करावी, असे आवाहन केले. विद्यार्थ्यांनी अभ्यासाबरोबरच शिस्त, मेहनत, प्रामाणिकपणा आणि सामाजिक जाणीव या गुणांचा विकास करावा. जीवनात यशस्वी होण्यासाठी सातत्यपूर्ण प्रयत्न आणि सकारात्मक विचारसरणी आवश्यक असल्याचे त्यांनी नमूद केले.
कार्यक्रमादरम्यान विद्यार्थ्यांना मोफत टूथपेस्टचे वाटप करण्यात आले. टूथपेस्ट मिळाल्याने विद्यार्थ्यांमध्ये उत्साहाचे वातावरण निर्माण झाले. आरोग्यविषयक मार्गदर्शनासोबतच उपयुक्त वस्तूंचे वाटप झाल्याने विद्यार्थ्यांनी आणि शिक्षकांनी या उपक्रमाचे कौतुक केले.
कार्यक्रमाला विद्यालयाचे मुख्याध्यापक श्री. सुरेंद्र शिरसाळे, पर्यवेक्षक श्री. बलभिम उल्हारे, मुख्य लिपिक श्री. नितीन जाधव, तसेच श्री. योगेश गवळे आणि श्री. देसाई उपस्थित होते. विद्यालयाच्या वतीने या उपक्रमाचे स्वागत करण्यात आले. विद्यार्थ्यांच्या आरोग्यविषयक गरजा लक्षात घेऊन अशा प्रकारचे उपक्रम भविष्यातही राबविण्याची अपेक्षा उपस्थितांनी व्यक्त केली.
कार्यक्रमाचे सूत्रसंचालन श्री. अतुल कोताडे सर यांनी केले, तर श्री. एस. सी. बर्डे सर यांनी आभार मानले. कार्यक्रमाच्या यशस्वी आयोजनासाठी विद्यालयातील शिक्षक व शिक्षकेतर कर्मचाऱ्यांनी सहकार्य केले.
या उपक्रमाचे कोपरगाव एज्युकेशन सोसायटीचे अध्यक्ष श्री. कैलास ठोळे, सचिव श्री. दिलीप अजमेरे, सहसचिव श्री. सचिन अजमेरे, सदस्य डॉ. अमोल अजमेरे, श्री. राजेश ठोळे, श्री. आनंद ठोळे आणि श्री. संदीप अजमेरे आदींनी कौतुक केले. वाढदिवसाच्या निमित्ताने विद्यार्थ्यांच्या आरोग्याची काळजी घेणारा आणि समाजात सकारात्मक संदेश देणारा हा उपक्रम अनुकरणीय असल्याचे त्यांनी सांगितले.
